كلام

.... وقعدت اتكلم واتكلم ...

وكأنى بطرد من حواليا شبح السكون

ومن جوايا شبح الموت ...

وقمت بأعلى صوت

وصرخت صرخة هزت كل الوجود

هدت كل الجمود

قالت وبأعلى صوت

لية يا زمن بنتعب؟

(وتعبنا دا بايدينا ولا رغم ارادتنا؟؟)

(ولية احنا احنا ولية غيرنا غيرنا ؟) 

ولا الزمن غيّرنا و تاه عنا؟

لكن الحلم لم يكمل ...

وصحيت وصرختى فحلقى موجوعة

وقمت من نومى مفزوعة

على هم جديد..

انا اللى كنت ف يوم .. ضحكتى لها العجب

صوتها سلاسل دهب

تسرى فعروقى لهب ما يهدا الا بانفجارها

وسط الهموم ..

وانا انا برضو ... انا اللى صبحت سواد

موتى لحظة ميلاد

وصوتى اصبح رماد

وميلادى اصبح عدم ...

ويقولوا قول يا ألم ...

قال الالم روايات

صارت فيوم مرايات

على كل من عدى وفات فى زمن مالوش معنى

الهم يجمعنا

والاكتئاب مزاجات...

وادينى بستنى ..

مش يمكن المعنى يرجع لايامنا

مهو مش بعيد عنا الهم ينسانا

جايز ف يوم شمس الحياه تصفى

لون الحياه يدفى

وارجع انا واليوم

بشفة مبتسمة .. وضحكة رنانة

والضحكة ترجع من تانى ضحكة لها العجب ...