لكل اصحابى اللى ف سنى أو اكبر " شويه صغيرين" او اصغر طبعا ....
أرجـــــــــوكـــــــــــــم ....
بما انكم كلها كام سنه قليلين وان شاء الله تبقوا أزواج وزوجات المستقبل وربنا يكرمكوا كمان وتبقوا أمهات وأباء المستقبل برضو
رجاء خاص :
انتو احرار ف حياتكوا الخاصه لكن قبل ما تفكروا ف تجربه الانجاب لازم تعرفوا كويس إن حقهم عليكوا انكم تعرفوا "تربوهم صح"
التربيه علم مش تجارب وعيالكوا مش فيران تجارب عشان كل حد فيكوا يجرب عليهم ازاى يربى
ومش كفايه نظرياتكوا الخاصه " مع كامل احترامى ليها طبعا " ومش كفايه برضو الكام كتاب اللى بيتقروا تقضيه واجب عشان يبقى اسمكوا فاهمين تربيه
- مش عيب نتعلم نربى ونسأل ناس متخصصه فى كيفيه التربيه وناخد كورسات كمان ليه لاء ... بيتهيألى كورس فوتوشوب ولا كمبيوتر مش اهم من انى اتعلم اطلع جيل جديد صح ازاى
انا شخصيا شايفه ان زى ما فى فحوص طبيه قبل الجواز لازم يكون فيه شرط اجبارى ان يتاخد دورات تدريبيه فى التربيه السليمه (وطبعا متكونش شهاده بتتشرى بالفلوس عشان نمشى الموضوع والف مبروك) ... دول فكر جديد قبل ما نكون بس بنوفرلهم اكل وشرب ولبس
و زى ما حاجات صغيره اوى فرقت معاكو زمان حاجات اصغر هتفرق معاهم ولأنهم يستاهلوا يكونوا احسن منكم وعقدكوا متأثرش عليهم أرجوكم تفكروا كويس اوى قبل ما تجيبوهم للدنيا لأن حقهم عليكم هيكون أكبر وأكثر قدسيه من حقوقكم انتم على انفسكم
واخيرا اسفه لو اسلوب كلامى ضايقكوا لكن هبقى اسفه اكتر لو اسلوب الكلام فرق معاكوا اكتر من الفكرة نفسها
