بصّى .. هوا انتى لو لسه هنا تعالى بقى
يعنى كفايه بقى تعالى غبتى كتير .. مش انتى قولتيلى ان بعد وقت هنتكلم وممكن اوصللك ونبعت لبعض اميلات وابقى احكيلك اخبارهم وايه بيحصل هنا ..
طب فاكرة لما كنتى ف المستشفى عشان العمليه .. كانت مستشفى ف الرمايه تقريبا وكنا بنبعت لبعض جوابات مع بابا .. كنت ببقى خايفه تكون الجوابات بتتفتح بس مكانش فيه طريقه تانيه نوصل لبعض .. وقبل ما تروحى عملتى الاظرف من جلد الكراسات الكرتون .. وفكل جواب تحكيلى بتعملى ايه هناك والمعامله ازاى والاكل والبنات اللى اتعرفتى عليهم وف الاوضه معاكى والممرضات .. وبعدين نحكى عن عالم بيطى .. وخالتو وجارتو والكواكب :)
كنتى بتحضّرى لخط الحكايه من قبل ما تروحى تقريبا .. فاكرة شجر الصنوبر
وانا كنت بحكيلك عنهم هنا .. وفاكرة المرة اللى رسمتيلى فيها طريقه المذاكرة " كتاب من جوا كتاب " ودا كان سبب انهم يعرفوا الطريقه دى
ساعتها اتأكدت ان الجوابات بتتفتح قبل ما توصل :(
كنا فضهر بعض .. انتى اول حد والوحيده اللى لما اتزنق ومحتاجه حاجه وانا ف البيت الجألك .. هههههههه فاكرة كنتى بتعرفى لما ابقى محتاجه اطلب فلوس من بابا من انى افضل واقفه على باب اوضتنا ساعتين بلف حوالين نفسى
" اوضتنا " يااااه عارفه مقولتهاش من اد ايه
لغايه دلوقتى لو لقيت الباب مقفول بخبط وابقى مستنيه صوتك يقولى ادخلى .. مع ان ماما هيا اللى بتبقا قافلاه عشان الشباك
متغيروش كتير عن ما عرفتيهم .. بس بابا مبقاش بيشرب شاى كتير زى زمان
وماما بقى مبقاش وراها غيرى .. انتى دايما كنتى بتعرفى تتعاملى معاهم احسن منى بكتير .. انا بقى مش عارفه اتعلم او يمكن مش عايزة اتعلم ..
احنا صحيح مكناش بنقضى وقت كتير سوا لكن واللهى بجد مش عشان انتى مشيتى انتى فعلا كنتى غاليه عندى اوى ..
فاكرة عيد ميلادك الاخير .. لما جبتلك العقد والحلق وخبيتهم على مخدتك على الارض وكتبتلك انه مفاجأة ..:)
مانا عارفه انك بتحبى المفاجأت وساعتها انتى كمان فاجأتينى اوى لما رجعتى وكنت انا نمت .. وصحيت على بوستك على خدى الشمال .. يخرب بيت دا احساس انا كنت صاحيه ومش مجمعه اى كلام وبحاول اجمع اى حاجه اقولها والاحساس توهنى اكتر
كنتى جميله اوى
كنت بحب اتفرج عليكى اوى وانتى قدام المرايه بتستعدى ونازله ..
كنت بدايق لما بسمعك قاعده مع ماما وقاعدين تحكوا واتصالحتوا .. عشان انتى عارفه الحقيقه .. وبستغرب اذا كنتى عرفتى حقيقه جديده انا معرفهاش وليه مبتقوليليش .. يمكن دا كان من رحمه ربنا بيها
فاكرة كمان لما كنا لسه ف المعادى .. وبنسهر نخطط هنهرب من البيت ازاى .. وانتى تقولى ننزل الستارة من الشباك ونربط فيها الملايه وانا اقولك ممكن نحدف المخده وننط فوقها عشان منتعورش :)
ولما كان العقاب نتحبس ف البلكونه .. دا كان بيبقى احلى عقاب ف الدنيا ننط من شباك الصالون ونجيب ميه وعنب ولاّ فاكرة عصير التفاح ..
ولما كنا بنكتب لبعض رسايل على ملّه السرير :D وناخد ال spot light بتاع بابا وننزل بالدور تحت السرير فى المخبأ السرى .. ونحط فرش واكل وميه ونكتب براحتنا .. ولما الرسايل اتقفشت وماما بتغير المرتبه
هههههه .. افتكرت الخيمه بالكوفرته ورا الباب وسندوتشات العسل الاسود
شلتات الانتريه لما كنا بنلعب ونحطها على الارض وننط عليها .. والالوان واللعب اللى ياما فكيتيها وانا بقلدك
ولما يكون فيه تليفون وشاكين ان ماما هترفع السماعه التانيه .. كنا team حلو على فكرة
صحابى اللى كانو بيعرفوا عن اسلوب علاقتنا دايما كانو يستغربوا .. اصل علاقه الاخوات يا اما بيرخموا على بعض يا اما قريبين اوى .. لكن الموازنه دى بتاعه ان مفيش تحكم وكل حد فحاله لكن واقفين على ارض واحده دى مشافوهاش قبل كدا
يمكن لو كنت شوفتك ساعتها كنت صدقت انك ... بس قوانين الرحمه عند ماما بتقول غير كدا
انا اتغيرت .. بس لسه نفسى اقرب منك
بعد الحادثه بعدت عن اى حد كان يعرفنا عشان احساس المقارنه بحاله قبل وبعد الفقد او المواساه دا مؤلم
لسه بحكى عنك .. لكن دايما بغفل الجزء المؤلم .. عن عمد على ما اعتقد
هوا مش احساس مسيطر عليا اوى يعنى .. بس وحشتينى