عن الموسيقى والعشق

عارف لما يبقى وراك حاجه وتسمع موسيقى وتشدك اوى من ودانك 

 شداك اوى لدرجه انك مش قادر تتخلص منها وصراع بين اللى مفروض تعمله والموسيقى اللى اسرتك 

طب عارف اللحظه دى لما تقرر فجأه تستسلملها وتقعد بسكون وخشوع فى حضرتها ناسى كل شئ 

ولا كلام ولا زمن

وتتابع موجاتك الملونه الشفافه جوا نفسك بتعلى وتقل وتفور وتتماوج وتلفك وتسحبك جواها لدرجه انك تحبس نفسك خايف النفس يطلع يلخبط حاجه من اللى حصل

كل نفس يبقى انقى واعمق من اللى قبله ومحمل بذراتها وابتسامه توسع وتوسع 

ولما يخطفك الوجد وتقوم تتحرك معاها برقصه من اختراعك انتا بس كقربان عرفان عن اللى عملته فيك

مش متخيله العشق حاجه غير كدا

اللغه والدين

عاوزة استأصل الدين من لغتى

محتاجه لغه جديده لا يتدخل فى كل تفاصيلها الدين باعتباره مرجعيه افتراضيه

مواقف ملهاش اعتبار دينى ببقى محتاجه اقول كلام لطيف من غير ما يكون دعا ومن غير ما اكون مضطرة احشر اسم ربنا فكل جمله ومش بالضرورة اكون كافرة عشان اعمل كدا لكن عاوزة مساحه حياديه حقيقيه واقدر اطبقها ف الواقع فعليا وابسط تطبيقاتها انى مقولش كلمه لمجرد ان الناس اتعلمت تقولها كدا وكسلت تغيرها او اقتنعت و لو ظاهريا بيها  او بيكفوا نفسهم مشقه الاختلاف بالذات لخطورة الاختلاف على الدين او قشورة .. بل خاصه قشورة ، او حتى محاوله ايمان ظاهرى عشان يبقى ليا رصيد عند ربنا ان شالله بكلمه حتى لو مقصدهاش وحتى لو باخطئ وباذنب  بس جايز دى اللى تحمينى من الوقوع ف مصايب او دى اللى تشفعلى و تدخلنى الجنه

( الحمد لله ، ربنا يخليك، ربنا يوفقك، بعون الله، ان شاء الله، بإذن الله،  لا اله الا الله، ربنا معاك  ... الخ )

مش عاوزة اكتر من حقى ف انى اقول كلام حقيقى حاساه انا اللى اخترته بمرجعياتى المطلقه

ومن غير زيف

هواجس عن المرضى النفسيين والاسوياء

حلمت قبل كدا ببرامج تعليم تربيه الاطفال ..لتنتج التربيه اطفال اسوياء

وجود المرضى النفسيين هوا اللى بيخلى العالم  ما نعرفه 

ناس مرضى .. وناس بيتكلموا عنهم : صحافه اللى هما ناس بتكسب من ورا الكلام عنهم

وناس بيتسلوا وبيضيعوا وقتهم فى الكلام عنهم

وناس بيعملوا بمعالجه المرضى النفسيين  

ولما بيرتكب المرضى النفسيين جرايم ايا كان مجالها بقا قتل ولا سرقه ولا من نوعيات اكبر زى حروب واباده جماعيه وجرايم  سياسيه  حسب مكانه المريض  فدا برضو بيقود لناس شغلتهم يقبضوا عليهم وناس يحاكموهم وناس يعاقبوهم او يحاولو اعادة تأهيلهم او حتى محاوله تحليلهم بصورة شخصيه او فى برامج تليفزيونيه

و لما المرضى بيأذوا حد حواليهم دا فى طريقه لنشر عدوى المرض النفسى لان الضحيه بيتحول لمريض نفسى  وهكذا 

وبكدا نعرف ان المرض النفسى ف حد ذاته ليه حسبه اقتصاديه كبيرة جدا .. وكتير اوى من مصلحتهم الدايرة متقفش

ايه معنى انسان سوى ؟؟ يعنى ايه سوي

سوي من سواء 

يعنى ناس متساويين 

متشابهين

مستنسخين

هل مقاييس السواء نسبيه تتغير بتغير الزمن والمجتمع ؟

ادين بدين الحب

بستغرب اوى على الامهات منين بيجيبوا قسوة القلب دى

انا معرفش عن طبيعه البشر لكن فكرة الامومه ف حد ذاتها وكل اللى بنسمعه وبيتروج له عن الحنان والامان والتسامح والحب الغير مشروط وحب بلا حدود  .. الخ 

مواقف عجيبه ابسطها لما ابنها يتوه ولما تلاقيه بدل ما تاخده ف حضنها وتطمنه تديله بالقلم على وشه

او النظرة الناريه والارهاب النفسى كنوع من العقاب بعيدا عن انواع العقاب التانيه  واللى ف المتوسط مش بتكون فى مستوى التعذيب الفعلى .. طبعا دا مش معناه انه مابيحصلش .. وبحاول اتفهم ان دا عقاب هدفه الاصلاح وعشان الاطفال يتعلموا وكل الكلام دا بس مش قادرة استحمله

فكرة الام بالذات والاب برضو طبعا فى المجتمعات المغلقه والقبلية و الصعيد مثلا وقسوتهم حفاظا على مظهر، وبالذات لو بنت القسوة بتكون اشد

حاجه زى ان البنت تدخل علاقه عاطفيه دى بالنسبالهم التار ولا العار

مش مهم هيا عاوزة ايه او شايفه ايه ..ومش مهم حتى اذا كانت ندمانه او شعورها بالذنب هيقتلها .. لكن بتكون فيه قسوة عجيبه 

كانهم بيعاقبوها على كل لحظه حب ادوهالها ف عمرها او حتى فكروا فيها 

بيكون فيه غضب وعنف سادى .. لكن الابشع بيكون فيه نوع عجيب من التشفى

تشفى فعلا لان الاحساس مبيكونش طبيعى .. والتناقد المرعب بتاع ان الام بتتمزق من جواها عشان بتحب بنتها ولا ابنها لكن قدامهم قاسيه جامده وعندها استعداد تقتلهم ان لزم الامر

هوا دا منطقى .. صحى ؟؟  طبيعى ؟؟؟  حقيقى  ؟؟ سوى ؟؟

اتعلمنا منهم الحب ممزوج بالقسوه

ليه مفيش تواجد فعلى للحب المرتبط بالرحمه  بالتسامح  بافتراض الاعذار وحب التغاضى عن الخطأ بس فى سبيل الحب

قد ايه عدد فعلى من الاباء والامهات حريصين يوصلوا لاولادهم انهم بيحبوهم من غير ما يكون دا متعلق بدرجه نجاح او سلوك معين او تنفيذ شئ او طلب 

دايما الحب مشروط ومن الكلمات المأثورة " اعمل كذا عشان بابا يحبك "  " اعملى كذا عشان ماما تحبك " .. وكأن الحب مش شئ افتراضى موجود لكنه اصبح نوع من الثواب والعقاب بالظبط زى الحاجه الحلوة او الاغراض الدنيا من الحياه

اللى اعرفه .. فى قوانينى الشخصيه عالاقل .. ان الحب مطلق 

معنى انى احب ان الحب دا عالم كبير بيكسب كل اللى بيلمسه باخلاقه وصفاته 

ان الحب لازم يكون مرتبط بالتسامح والرحمه

ان الاكيد ان الحب مينفعش يكون مشروط

انا مش كويسه

اوكى just قولى انا مش كويسه

انا      مش         كويسه

عادى يعنى

مش صعبه اوى

OMG

هيا ليه صعبه اوى كدا ؟؟

حشيش

سؤال اتسألته من كتير من صحابى .. بالذات لما كنت بقولهم ما تبطلوا شرب الحشيش 

" هوا انتى جربتيه ؟ "

لاء

طب معترضه عليه ازاى من غير ماتجربى؟ 

فى الواقع هوا سؤال منطقى جدا .. ازاى اعترض علىيه او على اى شئ عموما من غير ما أجرب

لكن اعتقد ان فيه وجهه نظر تانيه

انا معرفش كتير عن مستقبل حياتى لكن اللى اعرفه من دلوقتى انى ممكن اوصل للحظه اقف قدام كل الناس وحدى .. ساعتها مش هيكون اى حد بيأيدنى الا عقلى

ومش من العدل انى اخونه دلوقتى وانتظر منه يقف جمبى ف وقت جاى

انا اخترت اعيش بعقل واعى .. وحتى لو ارتكبت خطأ او ذنب افضل اختارة بعقل واعى مدرك انا بعمل ايه 

عقلى هو جل ما املك فى هذه الحياه

مينفعش اتآمر عليه .. ولا اءذيه او ادمرة بأى شكل من الاشكال

معرفش تماما ايه اسبابكم الكامله لاختيارة .. لكن ايا كان هوا راحه للعقل او هروب او اى شئ تانى ف معتقدش انه اختيارى المفضل

ودا طبعا ميمنعش انى احترم اصدقائى دول تماما لأنى مبعتبرش ان شرب الحشيش دا نقص اخلاقى ابدا انما هوا اختيار زى اى اختيار تانى فى الحياه 

زى مثلا ان حد ممكن يحب يشرب شاى ف وقت انا مش بحب الشاى

بس

الهجرة

فى رأيى الشخصى  الهجرة مش غلط

لا هيا خيانه ولا هروب

انما هيا اختيار .. مجرد اختيار عادل للانسان انه يعيش ف انهى ارض وتحت انهى سياسه و علم 

ازاى اكون بنادى بحريه الدين والعقيده وان دين الانسان من اختيارة مش اللى طلع لقى اباؤه عليه .. وبعد كدا اقول لاء الانسان لازم يتمسك بالارض اللى اهله اختاروا يعيشوا فيها او كمان مكانش اختيار انما لقوا برضوا اباءهم عايشين فيها .. لأ ومش بس كدا دانا اخلق الوهم العظيم المقدس بتاع معنى الوطن وهوا اللى اكلنا وشربنا  وتبقى خيانه عظمى مجرد فكرة انى اختار امشى

السفر مكانش ابدا حلم من احلامى .. ولا رفضاه 

لكن انا شايفه ان مش من حق حد يحجر على رأى حد او قراره لا فعليا ولا معنويا تحت اى مسمى او هدف 

البقاء فى الارض اختيار .. زى الخروج منها بالظبط

وبالذات لو كان البقاء معناه نطح ف الصخر او انتحار بطئ .. ساعتها بيكون الاختيار مش بس حق دا ضرورة  واللى بيمشى مش بيهرب لكن اختار حقه ف حياه عادله لان حياتنا بتتعاش مرة واحده ومن حقى اعيشها كويس فى المرة دى

لكن اللى بيختار يبقى فى المكان ويحارب عشان يغير الواقع  لازم يكون مدرك تماما انه هوا اللى اختار دا ومدرك عاقبه اختيارة وانه بيقامر على حياته .. ف اذا ادرك دا وبرضو اختار يبقى ويحارب فدا بيكون قرارة الخاص 

وميصحش بعد اى زمن يحاول يحمل مسؤوليه اختياره الشخصى للأى شخص اخر

واخيرا .. المجد للحريه ف كل ارض

فى القصص الحقيقيه الابطال بيموتوا

بقيت شايفه الخطر لما بتكلم .. قادرة اشم ريحته المميزة 

 مجرد رأى لكن قوة الكلمه ومدى حريتها او معارضتها لواقع لدرجه انى ممكن مش بس اتواجه بنفور لكن اخسر ناس قريبين منى او اتهاجم معنويا او قد يصل الامر انى اتهاجم ماديا حد الاعتداء او الخطف و القتل 

بقى الاختيار ف كل خطوة بمشيها ف كل كلمه بسمعها بطريقه اكثف من المعتاد

وبدأت اشوف القرار ف اخر الطريق .. هل عندك الاستعداد تموتى عشان دا ؟ 

اعتقد انى جوايا اوى فيه حاجه فعلا بتزقنى لا ادراكيا يمكن ل نهايه تراجيديه شويه .. بس لما بحاول ادرك اللى بيحصل او الطريق اللى بمشيه .. ومدى عقلانيه ومنطقيه الاختيارات بستغرب

هوا مش من الاسلم انى اسمع الكلام .. او اقول حاضر .. او حتى اختلف بس من غير مواجهه  

مفيش داعى للتصادمات المباشرة

لكن التمن على قد المكسب

هنا بييجى السؤال .. انتى عاوزة توصلى لايه بالظبط ؟؟ بتقولى مكانش فارق معاكى لكن فجأة لما تتحطى فقلب الموقف تعايشيه وكأنك طول عمرك ف الدايره دى وبتحاربى عشانها .. هوا انتى عندك فصام؟؟

يمكن .. واعتقد المرض النفسى دلوقتى بقا ميزة اكتر من عيب .. بقى سمه منطقيه جدا او دليل براءه ومعنى انسانى

مفيش ملايكه على الارض ولا شياطيين .. واللى بين دول ودول بشر بتتغلب عليهم نزعات من وقت للتانى

نفس الناس بيتحولوا ودا مش معناه مرض ولا تلون او حتى خروج عن سمات البشر المألوفه .. واعتقد ان معنى انتشار الصفه دى ان دا صفه متأصله فى البشر ودا دليل على البشريه 

دا ادعى اننا نقول عليهم انهم ناس فعلا مش ملايكه هما ولا شياطيين

دا طبعا لو كان التصنيف مهم بعد كل شئ

حزن

لما الحزن والقرف والاكتئاب يصر يصاحبك ويكسفك لو بس حاولت تفكر تبتسم لشعاع شمس بيدخل قلبك فبدايه سنه جديده

كيف تستنشق رئتاك الهواء المدنس !..

علاقات مع البرد

عجيب اوى احساس البرد لما بمجرد ما تفكر ف شخص فتدفى ..  ووانتا مستعد تقابله طول الوقت الزمن بيضحك وفجأه تعرف انك مش هتشوفه  فكل البرد اللى هرب منك يتجمع عليك كله مرة واحده والتعب

وانتا حتى مش عارف هوا بيمثللك ايه بالظبط

كاهنه عشتار . نون

ويتأكد لدى شبهها لهؤلاء الكاهنات حاملات القيثار على جدران احدى المعابد الجنوبيه. تلك امرأه استبقت كاهنه " الربه الذهبيه " حيه  داخلها .. أجادت فنون الحب والمنح والتلقى. هى ذات الكاهنه فى المعبد القديم. معبدى ومعبد "عشتار" " افروديت" . تمناها الرجال ولم تبخل عليهم ببركتى

لها عينان صافيتان النظرة

وشفتان عذبتا الحديث

صاحبه الجيد الطويل والصدر المضئ

الشعر بلون اللازورد

ساعداها يسموان على بريق الذهب

و أصابعها أشبه بأكمام اللوتس

صاحبه الخصر الرقيق والارداف الرهيفه

والسيقان المدافعه عن الجمال

هى ذات الكاهنه. تمنح من قوة . لا تتصنع ضعفا أو تتنفس كذبات من هواء فاسد.

لكنه لم يكن الغريب الذى يعرف إلهات الحب ويركع فى خشوع أمام الشعله المتقده فى قلب المعبد

وعندما تتلقاه الكاهنه تحممه فى ماء دافئ معطر بالطيب وتدلكه بزيت اللوز ثم .. تأخذه اليها فتفتح له أبوابا سحريه لرجوله تعرف معنى الانوثه داخلها. لا ينسى ابدا أنها كاهنه "حتحور" العذراء التى لا  يتملكها رجل لأنها ليست ملكا ألا لنفسها. بعد كل سبعه ايام مع غريب عابر تعود عذراء من جديد. 

تسترجع فرديتها

حبّه أنا ..

‎بالنسبالى على الصعيد الشخصى شئ مؤرف ان اسمع حد بيشرح موضوع ما فبدل ما يتكلم بحياديه عنه ويسيبنى اختار يبدأ يضمن كلامه الفاظ عاطفيه يحاول بيها استقطابى واستمالتى لرأيه الشخصى .. دا فى المواضيع الصغيرة حتى لو كان رأى ف لون شراب جديد اما بقى بالنسبه للى بيدخل الدين ذاته والمعتقدات الساميه ف استمالتى لأي من الجهتين فدا مش بس شئ مؤرف عابر .. لاء دا شئ مقزز ومريض مجرد ايمانك بانك تملك الحق المطلق وبتدعو ليه وتتخيل ان السماء والقوى الكونيه مجتمعه تدعمك وحدك لدرجه انها سلطتك تتكلم باسمها السامى دا شئ مريض .. حاول تتخلص من عقدك الدونيه وكن نفسك واتكلم باسمك من غير القاب او نسب لافكار اعظم منك و افتكر ان دايما عمر الافكار اطول من عمر البشر‎

الحب دين .. والخوف دين
وكل انسان بيختار يؤمن ولّا يكفر او حتى يكون عاصى‎

انا عشت حياتى قبل كده لكن عندى نوع من مرض الذاكرة بيخلينى مفتكرش الاحداث غير ف لحظه تكرارها او قبلها بأجزاء من الثانيه وباقى الاحداث " المستقبليه " بتكون على هيئه اشباح‎

دا مش منطقى ولا طبيعى ولا صحى ولا اى مسمى ان الحياه توصل ابناءها انهم يخجلوا منها يخجلوا من شعاع الشمس الجديد ومن شبح الابتسامه ولو مؤقت ومن لقا عنين باشتياق ومن اى فكرة مرحه او فيها شبح امل .. ان يبقى الحزن مبدأ حياه
دى مش حياه‎

افكار صغيرة شريرة من نوعيه ..
حد لما بلاحظ تفاصيله بفكر اد ايه جميل لو رقصت معاه ايقاعه حلو
حد لما بسمعه ببقى نفسى افضل واقفه قدامه كتير وبفكر ان " خلقنا كائنات متفرده بذاتها " عمر الوحده ما كانت عائق او عيب فى الحياه بالعكس
حد لما بشوفه بحب ابتسم اد ايه بسيييط اوى حال وحياه
ناس كتير مجرد صباح الخير منهم و ليهم بتكون مكافأه مش تحيه
يمكن ييجى اليوم واعترفلكوا بصورة مباشرة قد ايه لمحه منكوا مميزة‎

يارب اعيش واشوف اليوم اللى اشوف فيه مسابقات التليفزيون بتاعه 0900 بدل ما بتقول اكمل المثل " بكرة نقعد عالحيطه ونسمع ال .. بيضه ولا زيطه ولا ترمبيطه " الاقيها بتقول كم عدد شهداء محمد محمود او كم عدد مصابى احداث مجلس الوزرا ولا حتى كم عدد الغرقى فى الهجرة الغير شرعيه فى العقد الفائت .. وثمن الاتصال هيتحط فحساب لبناء بنيه تحتيه جديده ومدها للمناطق اللى معندهاش .. وتكون مراجعه الحساب علنيه كل اسبوع و استفتاء شهرى عن مدى رضى المواطن عن ابواب الصرف والقائمين عليها .. واسمع برضو بدل مسابقات حفظ القرآن مسابقات للبحث العلمى ف المواضيع الحيويه خاصه .. وبدل التبرع لبناء جامع ولا شرا مصاحف جديده لموزمبيق عشان معندهاش غير خمستاشر بس يا حرام تكون الاولويه للناس اللى بتكح تراب ومش لاقيين لا سقف ولا حتى حته ينامو فيها وعايشين فى ظروف لا تمت للآدميه بأدنى صله .. يارب اعيش لغايه اليوم اللى اشوف فيه اللى عنده فهم مغاير للدين والمقدسات مش بيهدر دمه لا ماديا ولا معنويا

‎

الفلسفه مش رفاهيه .. الفلسفه اسلوب حياه والتنظير مجدى طول مهو شايف هدفه قدامه مش سفسطائيه وخلاص لكن اللى خلق الفجوة لما يسود ان الحكماء مفكرين فقط وليسوا فاعلين بالضرورة .. ساعتها مبيفرقش اعظم حكيم عن اقذر قائد جيش مستخبى ورا مكتبه وبيرمى بجنوده ف نار المعركه‎

ضد كل مفرغات الكبت .. مع التصعيد والتسخين .. ضد الانفجار العشوائى الفوضوى الضوضائى .. مع الادراك والتخطيط المنظم للاستفاده من عنصر الكبت للصالح .. هو الدافع ان تبلد الضمير وسادت ثقافه الارتكان و معلش بسيطه ومجتش على دى

يارب .. الهم هبنى القوه عشان مكفرش بالحلم البرئ

‎و لمّا قسمت أنواع الهبات والحظوظ تركت حريه الاختيار لبنى البشر بشرط الاختيار واحد مفرد ولا مراجعه .. المال البنين الحب الصداقه العلم السلطه الحظ والنجاه من التجربه‎

"‎لم تُشفى بعد‎" ‎لا باس

سموه علم وسميته خذلان

لما الطفل يبكى فى اوائل ايامه يكون بيختبر بيئته وردود افعال المحيطين بيه وخاصه امه .. لو جريت عليه واستجابت لاقل صراخ منه هيفضل يطلب المزيد وهيا اللى هتتعب مع انها لو عودته يعيط شويه عادى من غير ما تستجيب دا بيعلمه يسكت بعد فترة ويتعود انها ليها اولويات او مشاغل اخرى بجانب مشاغلها بيه

 قالو علم نفس  .. وقلت خذلان

الطفل بيصرخ مش لانه هيموت من غيرها  " فى متوسط الرعايه المعتاده "  ولكنه بيطلب رعايه اكتر وتواجد وحنان اعلى حيث الكائنات فى اطوارها الاولى اكثر حساسيه

ومش معنى انها هتهمله شويه انه هيموت او بيتعذب بالضرورة لكنه بالنسبالى بيكون اول درس فى طبيعه الخذلان .. لما اطلب وملاقيش 

يمكن دا صحى للطفل نفسه بالمقاييس التقليديه او مريح للام .. ولكنه مازال فى تعريفاتى الخاصه خذلان كبير

و دا الفرق بين العلم القياسى و العلم المعتمد على القلب بالنسبالى

تذكروا خبرات اللحظات الاولى لكم

لما الغضب بيكون صلاه

مبقتش قادرة اتكلم براحتى  فى اى حاجه بحسها .. عشان الاحساس المقيم جوايا ب الذنب او المسؤليه عن ولو جزء من اللى وصلناله دلوقتى والغيوم عالكل

لكن .. مايمنعش انى احاول

هتكلم المرادى عن الحب 

احساس عجيب بيزداد كثافه انى محاطه بهاله او فقاعه مقدسه من الحب .. مش عارفه اوصف ازاى بس جميله اوى بكل الوان الطيف لكنها نور

بلمسها كل يوم ويمكن كل لحظه بتفاصيلها الصغيرة 

ابتسامه عابرة من حد معرفوش  او لحد معرفوش

نظرة عين 

دفا الصحاب

حب الاهل

احساس كدا جميل اوى بيوحد قلوب كل البشر على طعم عجيب .. 

الكلام دا مش العناوين والتعريفات لكن  دى نظريه اننا مبنشوفش الا اللى عاوزين نشوفه او ندركه 

ان احنا اللى بنظبط عنينا على مدى الرؤيه حسب اعماقنا فيها ايه وبعدين نبدأ نبص ف نكتشف ان كل اللى بنشوفه خاضع للفلتر اللى احنا بنفسنا اخترناه .. يمكن فلحظه غير كامله الادراك لكن دا ميلغيش تأثيرة

حاسه انى محاطه تماما بتفاصيل حبيبه محبوبه ومحبه

انى قاعدة تاعبه نفسى بدور عاللى مش فايدى فوقت مانا فعلا وصلت  لحاجات اكتر بكتير فقلب الناس

برا كل قواعد الحياه زى ما تعلمناها بكل تقليديتها 

الحياه بطعمى انا

ساعتها حتى الغضب بيكون صلاه

وبيتحول قلبك لقدس الاقداس

ودموعك تكون قرابين وتتمه  للشعائر المقدسه

وتبدأ تسمع صوت الكون بيكلمك بصورة مباشره والكلام موجه لشخصك لسبب بسيط ان انتا متوحد مع روح الكون

ساعتها نفسك المقدسه ونفسك الخادمه بيتوحدوا ويخلقوا نفس اقوى 

اعظم 

 انبل 

اشرف 

انقى

اعمق

ساعتها مبخافش اى حاجه تحصل لانى عارفه انها ليا مش ضدى .. ولانى عارفه انى هتخطى كل الصعاب لان اصلا الصعاب متواطئه معايا 

واننا بس اتفقنا نلعب سوا عشان اتدرب على حب اكبر  وابذل من نفسى مساحات اكتر

ولان ساعتها حتى بذل النفس بيكون هبه 

مش اداء

واحد وعشرين عام شهر وتلات تيام

وجدان

واحد وعشرين عام  شهر وتلات تيام

احساس عجيب بعد اربع سنين   ، ولما اجى افتكر كل التفاصيل وكأنها ف غيبوبه او عالم من ضباب  وكأن الذاكرة بتبلى وتستهلك من كتر استذكار الذكريات

يااااه ...

 اربع سنين 

ايام وابدأ اكون اكبر منك زمنيا " طبقا لقياسات الزمن الحقيقى "  لكن عمرك ما هتصغرى ولا اكبر

مبقتيش تزورينى كتير  .. وكأنى نسيتك  

لكن ازاى كل ذكرى ليكى او موقف عايشين اوى كدا .. حتى حاجاتك و وجودها حواليا  ولما ماما بترجع تحركها 

نفس الوجع .. يمكن مع استسلام اكبر 

الزمن بيعلمنى استسلم قدام امر واقع

لما بروح الاوبرا وبفتكر كلامك ولما كان نفسى اقعد معاكى هناك  .. ولما نوينا ان اروح معاكى معهدك واساعدك هناك واشيل معاكى

خلينى اعترفلك انك مشيتى ف وقت غلط اوى 

حاجات كتير فايتانا كنا هنعيشها سوا  

مع ان ظهر اختلافنا بس كنا قادرين نقف على ارض واحده 

بتكلمنى دلوقتى فاكرانى نسيتك .. ناسيه  او مش حاسه او مش فارق معايا

انا فعلا مش فاهمه هيا فاكرة ايه بالظبط .. لكن دا بيوجع

انى مش بتكلم معناه انى مش بحس بالضرورة  ... او فى الصورة القياسيه على الاقل

وصلت لمستوى من التعايش فى الكلام عنك لكن لسه بحس انى لو اتكلمت عنك كأنى بتاجر بالذكرى  .. ساعات

 وجدان .. هوا انتى هنا ؟

كونوا انتم .. تصبحوا مؤمنين

اتحكالى ف يوم زمان ان الجوامع كانت مش بس مكان صلاه لأن العباده ممكن تكون اعتكاف ف كهف منعزل .. ولكن اجتماع لاهل المكان للتشاور فامور الدين والدنيا والمعيشه 

نفسى اسمع خطاب دينى  معاصر وجرئ مش محطوط فقالب السمع والطاعه ولا حتى النصح

نفسى اسمع كلمه فكروا بدل كلمه اطيعوا 

مش حابه اتكلم عن المهازل  فى الخطاب الدينى واسلوب التدجين الفكرى الجماعى ومعامله القطيع  .. ولا الاستغلال السئ لفقر الدين والعلم واستخدام اسم الله باعتبارة القوى العظمى فى غير موضعه  لدرجه ان  المجادله او مجرد ابداء الرأى تبقى حرام

الجدال دينيا يعتبر امر سئ للاسف .. لكن اللى اعتقده ان المقصود هوا الجدال لمجرد الاعجاب بالرأى مش الجدال لاثبات وجهه نظر  حقيقيه ، أو دا اللى انا مؤمنه بيه على الاقل . لكن  لما الناس تخاف تتكلم او حتى تفكر ل تكون الفكرة حرام  وقبل ما الكلمه تطلع يكون فيه الف استغفر الله العظيم وخوف حقيقى ان لو الكلمه طلعت هيكون الرد عليها صاعقه منزله من السماء  أو حتى غضب الله وضيق الحال والرزق  من مجرد فكرة  

بعيدا برضو عن نظريات كتير متشعبه من المؤامرة ان الصهاينه وامريكا مصلحتهم ان مصر مايقوملهاش قومه والجو دا .. احنا كبشر ازاى بعدنا عن عقلنا للدرجه دى  وبقا كلام الشيوخ كلام مصدق يكاد يكون نزل عليهم الوحى لانهم معاهم توكيل حصرى يتكلموا باسم  الله ورسوله  .. مش دول برضو بشر زينا و وارد يغلطوا ؟  بل ان من حقهم يغلطوا 

اعتقد ان  المؤهلات الدينيه وحفظ القرآن كاملا دا مش كافى عشان اطلع على منبر جامع واخطب واقعد احلل واحرم اللى على مزاجى او اللى شايفاه صح .. اعتقد جديا ان مينفعش حد يطلع على منبر خطابه ف جامع الا وهوا دارس خطابه وعلم نفس واجتماع وملم بالاحداث السياسيه والمجتمعيه و حر الرأى وجرئ  بيعرف يفصل بين رأيه الشخصى والحياديه اللى لازم يكلم عامه الناس بيها 

حاجه جميله ان اروح ابنيلى جامع وافتتحه يوم جمعه وافاجئ الناس ان انا اللى هخطب فيهم .. و احتراما لمشاعرهم الدينيه ممكن البس غطاء رأس قدامهم  انا معنديش مشكله فدا لكن هكلمهم عن حياتهم و يومهم نهارهم وليلهم حريتهم و افعالم مش هكلمهم عن صح وغلط لان هما اللى بيقرروا ايه صح وغلط

هكلمهم عن حريه الرأى والتعبير  عن حريه الفكر عن  حريه الاختيار عن القوة فى الاختيار و قوة تحمل التوابع  عن الايمان الحقيقى اللى لما الانسان بيدوقه بيضحى بكل شئ فى سبيله و هاذكرلهم امثله من الدين لو عاوزين دا .. لكن الاكيد انى مش هقف موقف الناصح الامين المثالى و لا هكلمهم ابدا عن روعه الطاعه العمياء والتصديق حد الشهاده  لارضاء نزعه مجتمعيه او هلاميه جوا العقل وبس

هكلمهم عن الخير الحق العدل الجمال  هكلمهم عن الحب عن الايمان عن الخوف عن الالم هكلمهم عن الخطيئه و عن التسامح عن الامل  

هكلمهم عن ملكيتهم لحياتهم وقرارهم  هكلمهم عن ملكيه اولادهم لبكرة  هكلمهم زى ما بكلم نفسى وهكلم نفسى عشانهم كتير اوى 

هقولهم قبل اى شئ احنا بشر واتكتب علينا التعلم بالتجربه وانا زيكم مش منزل من السما واكيد اخطأت  ويمكن لسه بغلط وبتعلم ومش خايفه ولا بستخبى فكلام اكبر منى ومنكم

هقولهم بس كونوا انتم .. تصبحوا مؤمنين 

الرجل الثورى ..الأم

Salma Eltobgy

September 28 at 9:32am · 

• ان الحياه العائليه تستنفذ طاقة الرجل الثورى .. ليس فى وسعها ان تفعل شئ اخر غير ذلك .. الأطفال وعدم الاستقرار وضرورة العمل لاطعام العائله .. بينما ينبغى على الثورى ان يضاعف طاقته دائما حتى يمكنه توسيع نشاطه .فالايام تتطلب ذلك .فمن واجبنا ان نسير فى مقدمه الجميع ،لأننا نحن العمال الذين اختارهم التاريخ لتحطيم العالم وبناء عالم جديد .فاذا تأخرنا مستسلمين لإعيائنا أو لتخدير نصر صغير حققناه فاننا نكون قد ارتكبنا خطأ يقارب خيانه القضيه . ليس هناك من نستطيع أن نسير معه جنبا الى جنب دون أن نلحق الضرر بقضيتنا . ويجب علينا ان لا ننسى أبدا ان واجبنا ليس تحقيق فوز صغير ، بل الانتصار الكامل ...

  _ نيقولاى _ الأم . مكسيم جوركى

  
  

 و تفتكر انك اعقل من انك تراقب تحركات حد عالفيس بوك وكل تفاصيله المرئيه والمحسوسه على الصعيدين الحقيقى والافتراضى .. ولكن

الفقر و البلد

اكاد اجزم انى محستش بصورة مباشرة اد ايه ممكن ناس تبقى عايشه لحظه بلحظتها لدرجه ان ممكن نص جنيه ميأكلهمش يوم كامل او اكتر

واقفه ف محل ومستنيه دورى القى اللى قبلى بيشتروا زيت والراجل بيفضيلهم فكيس بلاستيك صغير من الازازة العاديه اللى بنجيبها دى عشان كميه ارخص .. ومرقه لكن اكتر فلوس اتدفعت كانت بجنيه طرشى

وفى الاخر بنستغرب وبنشتم اللى بيبيعوا صوتهم عشان خمسين جنيه .. اعتقد ان من حقهم يبيعوا البلد كلها .. بلد ماشافوش منها اى شئ الا الفقر والذل يبقوا عليها ليه

بلد مديتهمش حتى الفرصه او القدرة يحلموا ببكرة انضف

حتى ناسها اللى قدروا يفهموا شويه اكتفوا بالتفاخر بقدرتهم على الرؤيه والفهم وبيندبوا حظهم الغابر اللى وقعهم فوسط ناس اغبيا وجهله والخ من الاوصاف .. لكن محاولوش يرتقوا بالناس دى فعليا ولو بالتفهم ليهم كخطوة اولى وبعد كدا تفعيل مبادئهم على نفسهم قبل ما ينصبوا مشانق للناس

حمله تبشير

بحلم أعمل حمله تبشيريه فى كل القرى والاماكن النائيه والمجهّله .. هاكلم الناس عن حقوقهم وعن مدى ارتباط احتياجاتهم الاساسيه اللى مش لاقيينها بلعبه السياسه اللى مابيفهموش فيها .. يمكن لما يتعلموا تفرق معاهم .. صحيح قرصه الجوع مبتفرَّقش بين فاهم وجاهل لكن رد الفعل اكيد هايفرق .. اتمنى