عن موتى

أنا بكرة السرير ده .. مش عاوزة اموت عليه والاكيد ان اموت ف بيتى على سريرى دى مش هتكون طريقتى المفضله للموت

اتمنى اموت من غير الم كتير .. لكن الاكيد اتمنى اكون عارفه ومدركه انا عشت ليه وبموت ليه

افضل ان الموت بتاعى يكون جايلى انا مخصوص .. يعنى لو رصاصه مثلا تكون مستهدفانى انا شخصيا وعارفه انها عاوزانى مش صدفه او حادثه قدريه 

مش عاوزة موت معدى من جمبى وحود وخبط فيا صدفه .. عاوزة الموت بتاعى يكون جايلى انا ،عارفنى وقاصدنى و دور عليا 

عاوزاه ييجى يقف قدامى ويبص ف عينيا ويقوللى ايوة .. انا جايلك انتى

الموت بالنسبالى مش شرط حزن او مصيبه بالمعنى الدارج.. لكن منطقيا كل الناس بتموت ..فعادى يعنى انى اتأقلم معاه

 طقوسى المفضله .. 

لغايه دلوقتى محسمتش تماما عاوزة بعد موتى ادفن ازاى لكن الاكيد مش عاوزة ادفن ف مقبرة لكن لو ف الارض يبقى حفرة ليا بس .. وممكن اتحرق وانثر رمادى على النيل او بحر اسكندريه او يتوزع بين الناس القريبين منى .. فكرت ان جثتى تترمى ف البحر بس خفت من احساس السمك اللى ياكلنى وبعدين الناس تاكله تانى 

 مش عاوزة عزا تقليدى وعياط واسود والكلام دا خالص واكيد مش مكان للستات ومكان للرجاله  

عاوزة يتعمللى تأبين .. قاعه او عرض ف الشارع حتى فيه صورى مع الناس وف المواقف المختلفه وموسيقى حبيتها او الناس حاسين روحى فيها ورقص واكل والناس تلبس اللى تحبه مش شرط اسود ولا رسمى خالص.. وكل حد يقول كلمه عن تجربته الانسانيه معايا

مش عاوزة هاله التقديس العجيبه للميتين .. مش عاوزة الناس يفتكرونى الا زى مانا .. زى ما كنت وبس

اللى فاكرنى حلو يبقى كويس واللى فاكرنى وحش يسامحنى 

اعتقد ان لازم يكون اللى هيعملى التأبين صحابى مش اهلى .. لان دول علاقتى بيهم مضطره للتواجد اما صحابى فكانوا اختيار ودا معنى العلاقات الحقيقيه بالنسبالى

اتمنى قبل ما اموت يكون مع كل حد قريب منى حاجه منّى او يكون متاح ان صحابى  ياخدوا اللى يحبوة من متعلقاتى الشخصيه بعد ما اموت .. واتمنى تكون فيه فرصه لتوديع جثمانى متاحه لاصحابى واللى عاوز قبل دفنى او ايا كان ..

 قررت اتبرع باعضائى بعد موتى لاى حد محتاجها .. او لاغراض البحث العلمى لكن الفقرا والمصابين أولى طبعا

نفسى اموت من غير الم كتير لكن اعتقد وانا بتحرك دا هيكون احساسه كويس .. وانى اموت عشان قضيه جميله او تعنيلى كتير دا افضل

دى وصيتى وقابله للتعديل مدى حياتى .. ويعمل بأخر تعديل ليها