زهق

زهق عجيب .. قله صبر .. ضيق روح 

حاله عجيبه بتلفنى بقالها فترة .. مش عارفه من امتا بالظبط .. ومش متأكده انها بتزيد ولا بتقل بس الاكيد انها بتروح وبتظهر من تانى او يمكن انا اللى متقلبه 

من اعراضها قله الصبر على تفاصيل الاحداث .. لما باجى اتفرج على فيديو اول حاجه بعملها اشوف مدته اد ايه ويبقى شئ عظيم كل ما كان اقصر .. لو حاجه فيها كتابه كتير احاول اقرا بين السطور عشان افهم الموضوع العام واتلكك عشان اتجاهل الكتابه دى كلها .. بالذات لو اسلوبها ممل او محتاجه تعمق كتير انا مش ليا مزاج اعيشه فى اللحظه دى

بحكم على الاشياء من عناوينها .. ودا اكيد مش حلو طبقا لقوانينى الخاصه قبل اى شئ

بقبل المناقشات الطويله لكن بشروط .. اهمها الشخصيه اللى بتكلم معاها ومدى قربها منى وتقبلى ليها .. واى حد واقف على الحياد فى القرب منى بياخد مدى متزايد على منحنى التجاهل 

ساعات حتى لما كنت باجى اقرا كتاب .. خاصه الروايات اول ما ببدأ بقرا اخر صفحه او صفحتين عشان اتخيل خط سير الاحداث .. واقتل حاله الشوق لمعرفه النهايات 
حتى الكتب بفتحها واقرا اول كام صفحه .. واسيبها  . والعيب مش فيها.. ممتعه و فمود  مختلف تخلينى مانامش ايام متواصل عشان اخلصها  .. لكن مفيش

وحاجات كتير كنت بشتاقلها مبقتش بترضينى

زهقانه ...

معرفش ليه* 

تنّحت للدنيا كده

فجأة لقيتني مسكون بالملل

لا عندي رغبة في البكا

ولا في الكلام

ولا عارف أنام

ولا حتى بسأل إيه ده إيه

و أخرتها إيه

و إيه العمل

و أخاف أقول لأي حد

أحسن يقوم يقلبها جد

حد صاحبي ينزعج

يمد إيده في قلبه من باب الكرم

عشان يشاركني الألم

أو يستلفلي من لئيم حبّة أمل

حالة كده

معرفش إيه

 على سلامه  ـ معرفش ليه*