وبدأت الاحتفالات ..

وبأداء الرئيس الجديد لليمين يكون قد تسلم السلطه رسميا ودستوريا وبدأ بمباشره مهامه الرئاسيه رسميا ..

وبدأت الاحتفالات ..

احتفالات ملهاش اى تلاتين لازمه وصرف فلوس وتضيع وقت ومجهود على الفاضى ..احتفالات اقل ما يقال عنها انها صوره مجسده لنفاق العهد البائد من ايام الفراعنه وتنصيب الفرعون المصرى الجديد لايام الملكيه وتنصيب ولى العهد ملكا .. وملهاش اى معنى بتسليم السلطه لرئيس مدنى جديد .. 

الرئيس ما هو الا مدير لشئون الدوله لازم الناس لما تتكلم معاه تحترمه لكن متنحنيش وتطيعه لكن مش طاعه عمياء .. لازم يفهم ان طاعته نابعه من احترام وليس لتقديس او خنوع

يتعامل بتواضع مش لانه بيتفضل ويتكرم ويتواضع لاء دا التواضع فرض عليه ولان اقل عامل فى البلد متساوى تماما معاه فى الحقوق والواجبات الاتنين لازم يؤدوا واجبهم كاملا ليحصلوا على حقوقهم كامله 

الحقوق لا تمنح انما تنتزع .. ولو انتا مش مؤمن من جواك بتساويك فى الحقوق مع رئيسك ولا دساتير الدنيا كلها هتقدر تمنحك المساواه المزعومه دى .. 

احنا دلوقتى اللى بنرسم صلاحيات الرئيس وحقوقه علينا بارادتنا تماما باعتباره جديد ومش بيقلد حد سبقه .. لو ادناله حجم اكبر من حجمه هيعتبره حق مكتسب واحنا اللى هنخسر ..عشان كدا لازم نتعرف تماما على مدى قوتنا ونستخدمها صح ونبدأ الاصلاح على كل المستويات واولها جوانا .. جوا كل واحد فينا فرعون وعبد والاتنين مترقبين اللحظه المناسبه للظهور .. مهمتك انك تخلق الانسان السوى المتوازن بينهم 

عشان كدا مفيش اى لازمه للاحتفالات .. ولا الاستعراضات ولا الدعاء على المنابر باسم الرئيس الجديد .. ولا لافتات المباركه فى الشوارع ولا الرخام المكتوب عليه افتتاحات المؤسسات باسم الرئيس .. لازم يكون فيه نضج وطنى اكبر من كدا بكتير