قريت قبل كدا عن حد بيقول لو غيرت عاداتك يبقى لازم تغير معاها مجتمعك .. الفكرة دى واسعه اوى و متشعبه وليها فروع كتير
زى لما تغير دينك .. او مبادئك .. تمارس عادات جديده او تعتنق افكار جديده .. خاصه لو افكارك دى مش تقليديه فى الوسط المعتاد المحيط بيك
تفاصيل كتير اوى وساعات بتكون صغيره حد التفاهه .. لكن فعلا بتكون قويه اوى ف صداها ومؤثرة .. حاجه مثلا زى لما تقرر تشرب سجاير وتلاقى انك كنت ف وسط ناس مبيحبوش الدخان او العكس لما تبطل سجاير وتاخد بالك فجأه ان كل اللى حواليك مدخنين لا ويمكن كمان فيه ناس اصلا اتعرفت عليهم بسبب العاده دى .. وان دى كانت اقوى رابط بينكوا او يمكن الرابط الوحيد وتكتشف انك مضطر تغير مجتمعك كله وتدخل مجتمع تانى عشان تلاقى اللى يشابهوك ويتفقوا معاك
لما تبدأ تحط قوانينك الخاصه وتدرك ان قوانينك تختلف عن ارضيه القوانين اللى نشأت عليها .. حقوق مختلفه .. واجبات مختلفه .. كل التفاصيل
ولأننا بحكم التعود مش بنلاحظ الاشياء اللى بنتعود عليها الا لما بيدخل عليها عنصر جديد .. تبدأ تلاقى الناس اول حاجه بتلاحظك .. وبعدين تستغرب .. وتتباين ردود الافعال حسب القدر اللى انتا انتهجته من التغيير ومدى توافق دا مع وجهات نظرهم او حتى استعدادهم لتقبل عنصر الاختلاف معاهم
فيه اللى بيقبل ويشجعك .. لكن الاكتر بيستغرب وبيرفضك وطبعا يتراوح مدى الرفض من الاستنكار او النصح للعودة لنظامك القديم ولحد النبذ فى بعض الاحيان
قلت ان الاكتر بيستغرب ويرفضك لسبب بسيط ان انتا باكتسابك لعاداتك اكتسبت ف نفس الوقت مجتمع مؤيد وممارس لنفس العادات .. باختلاف مرجعيات اسباب ممارسه العادات دى لدى الافراد المختلفين من دين او عرف او تعود او غيرة
ولأن الانسان كائن اجتماعى بطبعه فبيحب يكون محاط بالدفء الانسانى اللى بيحمل التأييد والتشجيع والاعجاب .. وصعب يتحمل يعيش فى وسط مستغربه او بالأحرى مستنكرة لمدة طويلة وبيعانى من الحرمان العاطفى التأييدى بسرعه باعتبار ان التأييد دا دليل على انه ماشى فى الطريق الصح.. دا طبعا غير متعه المشاركه فى ممارسه الطقوس والعادات المتفق عليها مع المحيطين بيه
وكل ما يكون اللى اتغير دا يمس الجذور كان الرفض المحيط اقوى .. بل يعتبر تهديد غير مباشر للفكر السائد .. واحيانا يعتبر تهديد مباشر لما بيكون مقنع وبدأ يجذب افكار اخرى .. وتهديد من النوع دا يستلزم دفاع عن الكيان الحالى الفكرى القائم وعاده بيكون الدفاع دا بالمهاجمه اما السلبيه بالنبذ او الاضطهاد العاطفى او بالمهاجمه الايجابيه واللى بتصل - لما بيكون الامر يمس شخصيات نافذه او سلطات - للسجن او القتل
تغيرات من اللى بتكلم عليها دى ممكن تكون تغيير استايل اللبس .. سجاير .. التعامل مع مواصلات معينه .. شرا عربيه جديده .. تغيير الوظيفه او مجال العمل .. ظهور اهتمامات مختلفه زى الشعر والموسيقى او الرقص والتمثيل مثلا ..ممارسه رياضه جديده .. العمل التطوعى .. الايمان بحقوق جديده .. اعتناق مذاهب سياسه جديده ..اعتناق مبادئ مختلفه .. تغيير الدين .. اتباع نظام غذائى مختلف او حتى قواعد نظافه شخصيه جديده
No comments:
Post a Comment