نفسى اطلع منى وابصللى من بعيد

طالما حلمت ب ده .. اوووى 

دايما اتمنيت انى اقدر اطلع منّى ف يوم وابصلى من برايا .. من بعيد 

اشوفنى ازاى بتحرك .. بتكلم .. بضحك . وطريقه نظراتى .. مشيتى .. طبيعه تعاملاتى مع الناس .. الاحظ كل التفاصيل اللى بشوفها ف اللى حواليا 

يمكن ساعات فكّرت ان ده سهل لو حد صورنى فيديو واتفرجت عليه ولمحت تفاصيلى .. بس لأ الحقيقه دايما مختلفه . لمسات الطبيعه وانطباعاتى انا اللحظيه وقت الحدث ووقت الفرجه عليه اكيد هتختلف

ساعات زمان كنت بتخيلنى ماشيه قدامى فى الشارع .. وسابقانى بخطوات واقعد اسرع خطوتى عشان الحقنى وساعات اجرى .. لكن ابدا موصلتليش

نفسى اتعرف على ملامحى زى ما بتعرف على ملامح صحابى .. بيتهيألى على الرغم من انى ببص كتير ف المرايه بس لو شفتنى قدامى مش هاعرفنى .. مش هاعرف الشبه

ساعات اقعد ابصلّى اوى فى المرايه .. مش ببتسم مش بتحرك لكن ببص جوا عنيا .. بس  نفسى ابص جوا عنيا قدامى مش من مرايه .. عاوزة اشوف جواهم ايه

انا كمان نفسى اسمع صوتى الحقيقى اوى .. زى ما غيرى بيسمعه مش زى مانا بسمع

عرفت ان الفرق بيننا وبين صورنا هوا الفرق بين الحقيقه والانطباع الذاتى عنها ...

انا عاوزة اشوف الحقيقه